Tupi, South Cotabato–Patay ang usa ka lalaki human kining gipusil sa wala pa mailhing suspetsado sa Barangay Lunen, Tupi, South Cotabato, pasado alas 7:00 sa buntag.
Giila ang biktima nga si Charlito Orencio, 63-anyos ug residente sa Purok Malipayon, Barangay Lunen, Tupi, South Cotabato. Sa imbestigasyon sa kapulisan, nagbaktas ang biktima aron nga manugway sa iyang kanding dihang kalit lang kining gipusil sa wala mailhing suspek pila ka higayon igo sa nagkandaiyang parte sa iyang kalawasan.
Paspas nga misibat ang suspek human sa pagpamusil, samtang ang biktima gidala pa sa ospital apan human sa pipila ka oras, nakabsan kini sa iyang kinabuhi. Narekober sa crime scene ang upat ka fired cartridges ug usa ka deformed slug sa caliber .45. Sa karon nagpadayon pa ang gihimong imbistigasyon sa kapulisan kalabutan sa maong insidente.
