Lalaki nga napatay sa shoot-out sa checkpoint sa banwa sang Polomolok, nakilal-an na.

Nakilal-an na ang isa ka suspek nga napatay sa nagluntad nga shoot-out sa checkpoint sang kapolisan sa Purok Malipayon, Barangay Lumakil, Polomolok, South Cotabato sang tinalikdan nga adlaw.
Ginkilala ang suspek kay Jerald Oday Despues, 23-anyos, may-asawa, self-employed kag residente sang Prk. 14, Brgy. Mabuhay, General Santos City matapos nga mismo ang iloy sini ang nagkumpirmar.
Base sa imbestigasyon suno kay Police Sr. Supt. Franklin Alvero Police Provincial Director sang South Cotabato Pnp nga plano nga atakehon sang tatlo ka mga suspek sakay sa motorsiklo ang mga kapolisan nga nagapatigayon sang checkpoint sa lugar.
Nahibaluan nga si Despues ang isa sa sakay sang motorsiklo nga nagluthang sa mga polis nga nagacheckpoint . Apang tigayon naman nga nagbalos luthang ang mga polis kag napatay sini ang suspek.
Samtang madasig naman nga nagpalagyo ang duha ka mga kaupdanan sini sakay sa motorsiklo padulong sa Brgy. Rubber sa nasambit nga banwa.
Narekober naman sa natabuan sang insidente ang caliber 357 nga loaded sang apat ka mga bala, sling bag nga may unod nga 2 ka sachet sang suspected shabu kag mga basyo sang bala.