Malampusong nasikop atol sa Joint Buy Bust Operation ang suspetsado sa pagpayuhot sa illegal nga droga kaganinang sayo sa kadlawon sa may Purok 6 Barangay Pala-o ning syudad sa Iligan.
Maoy nasikop ang suspetsadong si Sol Rubio y Balba, 39 anyos, minyo, walay trabaho ug molupyo sa nasangpit nga dapit.
Ang maong suspetsado anaa sa listahan sa Unified Watchlist sa kapulisan.
Napalitan kini sa poseur buyer ug usa ka sachet sa gituohang shabu.
Sa gihimo nga pagsusi sa panimalay sa suspek, nakuha sa iyang possession ang duha ka dagko nga sachet sa shabu, 19 ka small sized sachet sa shabu, ingon man 500 pesos nga buy bust money, ug usa ka kaha sa sigarilyo.
Ang mga droga adunay estimated value nga mokabat sa 25 mil ka pesos.
Paslak sa detention cell sa police station 5 diin mag atubang kini sa kasong paglapas sa section 5 ug 11 sa Republic Act 9165.
Ang maong joint buy bust operation gipangunahan sa City Intelligence Branch sa City Drug Enforcement Unit ug ang ginsakpan sa kapulisan sa Police Station Number 5.
