General Santos City—tingkagol sa silda sa Polomolok Municipal Police Station ang usa ka Pusher human kining nasikop sa gilusad nga buybust operation sa kapulisan sa Prk. Masagana, Barangay Magsaysay, Polomolok, South Cotabato.
Giila ni Police Sr. Inspector Hernan Gabat, Deputy Chief Of Police sa Polomolok PNP ang suspetsado nga si Joey Cabalhin Alias “Joy”, 52 anyos, residenti sa Bayan Subd., Barangay Magsaysay, Polomolok.
Nasayran nga gabie niadtong Lunes, June 26, 2017 dihang gihimo ang buybust operation sa Norcus Compound nga miresulta sa pagkasikop sa nahisgutan human kining napalitan ug (1) ka sachet sa gituohang shabu gamit ang marked money nga P500.00.
Gibutyag pa ni PSI Gabat nga si Cabalhin dili apil sa ilang drug watch list ug wala usab kini mi-surface sa kapulisan niadtong nakalabayng tuig dihang gihimo ang Oplan Tokhang, apan tungod dunay mga report nga nakaabot kanila bahin sa iligal niining gimbuhaton nagpahigayon ug surveillance ang iyang mga sakop aron kumpermahon ang impormasyon.
Dihang nakumperma nga siya namaligya ug druga didto na gihimo ang operasyon batok sa nahisgutan.
Kasong paglapas sa sec. 5 sa art. II ilawom sa RA 9165 ang giatubang karon sa suspek nga si Cabalhin.
