General Santos—Dili buot nga byaan sa kapuyo-mao kini ang rason nganong nahimo sa usa ka Noel Tano, 43 anyos nga taga Purok Yusaville, Barangay Sinawal Gensan ang pag-inum ug hilo.
Nasayran nga alas 2:45 ang takna sa hapon dihang nakit-an nalang ang biktima didto sa ilang lugar nga nagsuka-suka ug nakabati ug kalipong mao nga gidala sa ospital.
Didto na nasayran nga niinum diay ang nasampit ug insecticide.
Sa pakighinabi sa RMN Gensan ngadto sa biktima nasayran nga hilabihan ang kadismaya niini human niprangka na ang iyang Live-in partner nga siya bulagan gumikan matud pa duna na kini bag-ong uyab.
Aminado ang biktima nga iyang ginapasakitan ug usahay ginapaulawan ang iyang kapuyo kansa usa sa mga rason nganong buot na syang bulagan, apan iyang gibutyag nga andam sya nga magbag-o aron nga dili na byaan sa iyang live-in partner.
Usa sa mga rason nganong dili niya buot nga byaan sa iyang kaipon mao ang ilang mga anak. Nasayran nga sa kasamtangan nag-paalim nalang ang biktima sa Dr. Jorge Royeca Hospital.
