Sa interbyu sa DXDC RMN Davao kang Police Corporal Kerwin Lloyd Catigan, personahe sa Sta. Maria Municipal Police Station (MPS), gibutyag niini nga wala pa na-claim sa tagtungod ang wala pa usab nailang biktima, ug tungod kay kini anaa na sa state of decomposition o padulong na maagnas, temporaryo kining gilubong sa nahisgutang barangay.
Matud ni Catigan, ang biktima ginabanabanaang anaa sa 20-30 anyos ug anaa sa 5-5’6 ang gitas-on. Aduna usab kini tattoo nga X ubos sa iyang wala nga mata. Nakahikot ang kamot ug tiil sa biktima ug gibaatan usab og duct tape ang baba ug katungan sa nawong niini.
“Dili pa sya (masuta kung naay foul play) kung walay tagtungod. Kung mailhan na, pwede to ipakalot para ma-autopsy, matan-aw sa legal basis niya,” matud ni Catigan.
Giawhag usab sa pulis ang publiko kung kinsa kadtong nawad-an og miyembro sa pamilya o kaila, nga makigkoordinar kanila aron nga maberipika ang nahisgutang insidente.
“Kung naay mga nakaila o naabot sa ilaha ang maong report, ang patay’ng lawas nga nakuha sa Sta. Maria, diri sa among munisipyo, palihog lang ko pwede mo muanhi diri or makig-update sa among istasyon bahin sa maong patay’ng lawas,” panawagan sa pulis.
RadyoMaN Kirby Manzon
