Glan, Sarangani Province–Posible matud pang mag-atubang ug kasong reckless imprudence resulting to homicide ang usa ka Elvi Benzonan hamtong ang panuigon nga nanimuyo sa Glan Sarangani Province human nga makuryentehan patay sa gipanag-iyahan niini nga fishpond nga nahimutang sa Prk. Punsad Barangay Burias, Glan, ang usa ka Clinton Van Del Rosario, 25 anyos, nga nanimuyo sa Purok Islam, Barangay Burias alas 4:00 ang takna sa kaadlawon.
Sumala pa ni Police Lieutenant Ma. Guscel Andrada ang Deputy Chief Of Police sa Glan Municipal Police Station nga basi sa nahimo nilang imbistigasyon, nakit-an nalang matud pa nga wala nay kinabuhi ang nahisgutang biktima sa maong lugar tungod nakatamak kini ug live wire sa maong fishpond.
Migula nga nangawat ug pasayan ang nahisgutang biktima kauban ang lain pang duha ka mga kaubanan niini ug sa pag-gawas niini sa maong fishpond aksidenti niining natarog ang wire nga hinungdan sa iyang kamatayon.
Nakuha duol sa patayng lawas sa biktima ang duha ka sako sa pasayan kansa gituohang gikan sa fishpond.
Dugang pag butyag ni PLT. Andrada nga basi sa balaod bawal magbutang ug kuryente palibot sa usa ka lugar nga walay mga warning sign bisan paman ug makapila na kini nga nakawatan.
Samtang gihingusgan usab ni Mylyn Dela Rosa ang kaipon sa namatay nga gituyo gayud ug patay sa mga nagabantay sa maong fishpond ang iyahang kapuyo.
Sumala pa niini nga basi sa pahayag sa mga kauban sa iyahang bana nga makaduha matud pa gipakuryentihan ang nahisgutan apan masalbar pa unta kini tungod buhi pa ug nagapangayo pa ug tabang apan gipasagdan matud pa kini sa mga bantay hangtod nga makabsan ug kinabuhi.
Dugang pa sa ginang nga kung tinuod nga nangawat ang iyang kapuyo, unta gipadakop nalang ug gipapriso inay patyon pinaagi sa kuryente tungod kay dili matud pa kini makatarunganon.
Gipanghimakak usab sa nanag-iya sa fishpond nga si Elvie Binsonan nga gituyo niini ug butang ang kuryente alang sa mga nagapangawat sa iyang fishpond. Matud pa nga ang wire sa kuryente nga natamakan sa biktima ang para matud pa sa suga sa iyahang prawn farm tungod kay ngit-ngit ang maong lugar.
Samtang giangkon sa nahisgtan nga makapila na gyud ka higayon nga nakawatan ang iyang prawn Farm ug gani milyon na ang lugi niini apan nagpadayon kini aron lang nga makabawi ug may ikabayad sa iyang mga bayranan.
Makapila na usab niya gipatawag sa barangay ang mga tawo sa maong lugar nga iyahang nakit-ang nagapanguha ug pasayan apan pag abot nga moreklamo na siya wala nay mobarog isip witness sa iyahang reklamo. (Dave Silagan)
