Pormal na nga napasakaan ug kaso kagahapong adlawa may kalabutan sa Physical Injuries ilawom sa batakang balaod sa kodigo penal ang usa ka lalaking nangulata.
Sa nakuha nga impormasyon sa kapulisan ang mga biktima mao sila si Rey Ore, 24 anyos, ug si Ryan Clas, 23 pulos kini residente sa Sitio Supot, Brgy. Tamarok, Jose Dalman kinsa gikulata ni Carlito Clas, 48 anyos residente sa susamang dapit.
Saysay pa sa mga biktima nga lango sa ilimnong makahubog si Carlito niadtong higayona sa dihang iyang gihimo ang pagpangulata nga matod pa wala sila nagtuo nga mao kadto ang ilang dangatan.
Dugang pa kini si Rey Ore nagbaklay niadtong higayona ug iyang nahinagbo si Carlito Clas ug nagkanayon nga “matanod najud ko ani kay nidaog man akong kapitan”. Ug didto na nagkalalis nga miresulta sa wala pagkasinabtanay hinungdan nga nagsumbagay ang duruha.
Gi ayo-ayo pag kulata sa suspetsado ang biktima hinungdan nga nakaangkon kini ug daghanang mga bun-og sa dagkadaiyang parte sa lawas. Gisulayan pa unta kini ug ulang ni Ryan Clas apan gi apil paman hinuon siya ug kulata nga miresulta pa hinuon sa pagka putol sa iyang tudlo.
Sa pagka karon puno sa pagmahay si Carlito Clas may kalabot sa iyang nahimo nga misangpot pa hinuon sa iyang pagka preso.
