General Santos City—Padayon pang giatiman sa mga mananambal sulod sa balay tambalanan ang biktimang si Riven John Eliga, 23 anyos, ulitawo, laborer og nanimuyo sa Cahilsot Village Brgy.Calumpang ning syudad kansa nadunggaban sa suspek nga si Francisco Bernades, 53 anyos, nga nanimuyo usab sa Zone 6, block 11 Brgy. Fatima.
Kahibaluan nga pasado alas 9:00 sa gabie sa miaging adlaw dunay usa ka concern citizen ang midangop sa Fatima PNP aron ipahibalo ang nahitabong kagubot og gilayong girespondihan sa mga personahe sa maong stasyon apan sa paghidangat sa lugar wala na naabtan ang biktima gumikan kay gidala na sa pribadong ospital sa Calumpang alang sa medikasyon.
Sa imbestigasyon sa kapolisan migawas nga personal grudge ang motibo sa krimen samtang gatindog ang suspek kauban ang kapuyo niini atubangan sa ilang panimalay kalit matud pang giduol sa biktimang si Riven uban ang iyang manghod og ilang gikalata ang suspek hinungdan nga nakahimo og pagkuha og kutsilyo ang nasampit og gidunggab ang biktimang si Riven nga miresulta sa pagkaigo sa tiyan niini.
Human sa maong panghitabo boluntaryo usab nga mitahan ang suspek sa Fatima Police Station. Samtang giandam na sa kapolisan ang tukmang kaso nga ipasang-at batok sa suspek. (Reynald Timario)
