General Santos City–Gikabutyag ni Police Lieutenant Colonel Marvin Duadua ang Chief Of Police sa Polomolok MPS nga hangtod karong panahona wala pa gihapon nailhan ang patay nga lawas sa usa ka lalaki kansa brutal nga gipatay sa wala mailang suspek nga nakit-an sa Purok 1 Brgy.Polo, munisipyo sa Polomolok niadtong adlaw nga Sabado.
Sumala pa ni Duadua nga ilaha ng gipanawagan sa social media apan wala pa gihapoy pamilya nga mi claim sa patay’ng lawas sa biktima gani saysay pa niini nga dunay naglantaw nga pamilya sa patay’ng lawas apan pakyas pa gihapong nailhan.
Pagpaklaro usab sa opisyal nga blanko pa sila sa motibo sa kamatayon sa biktima makasugod lang matud pa sila sa imbestigasyon kung mailhan na ang maong lalaki aron masuta kung unsa ang gimbuhaton niini ayha pa kini gipatay.
Nagtuo usab si Police Lieutenant Colonel Marvin Duadua nga dili taga Polomolok ang biktima gumikan kay wala pay pamilya nga mi-claim sa maong patay’ng lawas sa lalaki.
Gani pagtuo sa opisyal nga dayo lamang kining biktima ug gidala lang sa lugar ug gipatay nga walay kalaban-laban pinaagi sa pagdunggab sa makadaghang higayon sa likod niini nga hinungdan sa iyang kamatayon.
Nakit-an matud pa sa trabahante sa poultry nga dunay iro nga nagkalot sa Kanal sa gawas nga bahin ug namatikdan niini nga dunay nanimaho hinungdan nga iyang gilantaw ug nakurat na lamang kini dihang nakita niya ang ulo sa lalaki nga gilubong sa lugar .
Sumala pa ni Police Lieutenant Colonel Marvin Duadua nga human gipatay ang biktima posibleng gilabay kini sa suspek sa Kanal ug gitabunan nga mabaw lang ang pagkalubong niini hinungdan nga nakita ang ulo human nakalutan sa iro.
Padayon nga nanawagan ang Polomolok PNP sa mga nawad-an ug miyembro sa ilang pamilya nga hangtod karong panahona wala pa nakauli sa ilang panimalay nga makig-alayon lamang ngadto kanila kay basin ilaha na kining kabanay ang nakit-ang patay. (Reynald Timario)
