General Santos City–Gipasakaan na ug kasong frustrated homicide sa Tantangan PNP ang suspetsadong si George Silva,44 anyos, construction worker, residente sa Prk.Nursery,Brgy.Maibo,Tantangan, South Cotabato kansa maoy responsableng mipusil sa usa ka panday nga si William Susbilla Jr,28 anyos ug nanimuyo usab sa nasampit nga lugar.
Kahibaloan nga basi sa imbestigasyon sa Tantangan PNP sa pagpanguna ni Police Captain Romeo Albano jr. migawas nga samtang anaa sa lamay ang biktima sa iyang silingan nadalin-as matud pa kini gumikan sa kahubog ug nabanggaan niini ang suspek nga anaa usab sa impluwensiya sa ilimnong makahubog.
Nasayran usab nga human sa panghitabo gilayon matud pang gisundan sa biktima ang suspek pagawas sa lugar aron unta mangayo ug pasaylo apan wala kini gipaminawan ug gideretso hinoon ug pusil ang biktima sa ulo niini.
Wala man usab nasikop ang suspek gumikan paspas man usab nakasibat sa lugar human gihimo ang krimen nga kasamtangan padayon ng gipangita sa kapulisan.
Samtang luwas na usab sa makuyaw nga kahimtang ang biktima nga nagpabilin pang nagpaalim sulod sa balay tambalanan. (Reynald Timario)
