Lalaking nangulata nadunggaban-patay

155

Davao City – Patay ang usa ka 18 anyos nga lalaki human madunggaban sa Luna Extension, Brgy Zone III, Digos City alas 3 sa kadlawun kagahapong adlawa, Enero 8, 2018.

Sa report sa Digos PNP, giila ang namatay nga si Jerome Arabe ug residente sa Brgy Ruparan, Digos City samtang lain pang kauban niini nga mga samaran naila nga sila Frince Broca Etulle ug Michael Tapdasan, pulos 18 years old ug mga residente sa Purok Camel, Brgy Zone III syudad sa Digos.


Sa inisyal nga imbestigasyon, gikulata matud pa sa mga nasangpit ang usa ka Marchan Dianga Malayang, 24 years old, baker ug residente sa Purok 3 Brgy Saub, Matanao, Davao del Sur samtang kini naghulat og tricycle pauli ug wala damha nga dunay dala nga kutsilyo si Malayang ug gidepensahan ang kaugalingon pinaagi sa pagdunggab sa tulo ka mga lalaki nga miresulta sa pagkamatay sa usa kanila.

Gidala sa balay tambalanan ang mga samaran ug gikustodiya na sa kapulisan ang lalaking giingong midepensa ra usab sa iyang kaugalingon.

Sa karon, nagpadayon pa ang imbestigasyon kalabotan sa insidente.

RadyoMaN Renz Barbarona

Facebook Comments