Nagpabiling nagpaalim sa usa ka pribadong ospital sa koronadal ang usa ka panday nga si William Susbilla Jr, 28 anyos, ulitawo nga nanimuyo sa purok Nursery, Brgy.Maibo Tantangan, South Cotabato kansa gipusil sa usa ka construction worker nga si George Silva Sr.44 anyos minyo, residente usab sa nasampit nga lugar ala 1:15 sa kadlawon niadtong milabay nga adlaw.
Sumala pa ni Police Captain Romeo Albano Jr., labaw sa Tantangan PNP nga basi sa ilang imbestigasyon migawas nga samtang anaa sa lamay ang biktima sa iyang silingan nadalin-as matud pa ang nasampit gumikan sa kahubog ug iyang nabanggaan ang suspek.
Gilayon man usab gisundan sa biktima ang nabanggaang suspek nga anaa usab sa impluwensiya sa ilimnong makahubog pagawas aron nga mangayo ug pasaylo sa nahitabo apan wala kini gipaminawan ug gideretso hinoon kini ug pusil sa ulo gamit ang wala pa matinong armas.
Personal grudge karun o sa kahubog ang ginasundan nga motibo sa kapulisan sa pagpusil sa biktima.
Sa kasamtangan naghimo na ug hot pursuit operation ang kapulisan batok sa suspek nga gilayong nakasibat human gihimo ang krimen sa posibleng masikop ug mapasakaan ug tukmang kaso. (Reynald Timario)
