Davao City – Gipaniguro sa City Tourism Office (CTO) nga malingaw gihapon ang mga Dabawenyos bisan pa man og gikansela ang Lamdag Parada nga usa sa mga dagkong aktibidad nga gi-atangan sa Pasko Fiesta sa Davao karong tuiga.
Kini ang gibutyag ni Generose Tecson, ang head sa CTO sa pakighinabi sa DXDC RMN Davao. Matud pa niini nga ang kakulang sa mga partisipante ang rason sa ilang pagkansela sa Lamdag Parada ug dili sumala pa maayo ang paggahin og dakong budget kung anaa lamang sa duha o tulo ang mo-apil.
Bisan pa man niini, inay nga Lamdag Parada, usa ka Dance Presentation ang muhatag og kalingawan sa mga Dabawenyos pinaagi sa Alab Poi Led Light Dancers sugod Disyembre 19 o karong gabii hangtud sa Disyembre 21, 2018.
Sumala pa ni Tecson nga adunay duha ka show matag gabii ang maong grupo nga gikan sa Manila nga magsugod sa alas-7:30 hangtud alas-8:00 gabii ug alas-8:30 hangtud alas-9 sa gabii diin tunga-tunga niini mao ang 3D video mapping light show atubangan sa City Hall.
Kahinumduman nga nag presenta usab ang Alab Poi Led Light Dancers sa opening sa Pasko Fiesta sa Davao 2018 niadtong Nobyembre 23, 2018.
RadyoMaN Kirby Manzon
