Human gi-ambush kagahapon sa buntag didto sa Iponan, Cagayan de Oro City ang usa ka mayor sa usa sa mga lungsod sa Lanao del Sur, mi-awhag si Governor Mamintal Adiong Jr., ngadto sa kapulisan nga paspasan ang ilang imbestigasyon.
Matud pa ni Jennie Tamano, information officer sa probinsiya, gikasubo matud pa sa gobernador ang nahitabo kang Lumbaca Unayan Mayor Somerado Guro ug gipanghinaut niini ang hinanaling kasulbaran sa maong kaso.
Matud pa ni Tamano nga paingon niadtong tungora sa Marawi City si Guro aron motambong unta sa meeting sa Provincial Inter-Agency Task force on COVID-19 apan wala na kini makalahos pa.
Gikumpirma ni Major Ivan Viṅas, spokesperson sa Cagayan de Oro City Police Office, nga wala mailang mga suspek nagsakay og motorsiklo ang mipusil sa mayor nga sakay sa usa ka itom nga Toyota pick-up kauban ang iyang asawa ug usa ka staff.
Samaran ang 60 anyos nga mayor apan namatay ang iyang 26 anyos nga asawa pipila ka oras samtang gitambalan sa hospital.
Nakaangkon og samad-pinusilan ang iyang driver nga si Ibrahim Gani, 58 anyos, ug usa ka staff nga si Abdul Rafi Guro, 19 anyos, apan anaa na kini sa luwas nga kahimtang.
Nagpadayon ang imbestigasyon sa kapulisan sa Cagayan de Oro City sa maong panghitabo. (Divina M. Suson, Lanao del Sur, June 4)
