Mi-apela kagahapon si Lanao del Sur Governor Mamintal Adiong, Jr. ngadto sa nasudnong kagamhanan nga temporaryo unang ihunong ang Hatid Probinsiya program.
Kini nga programa mao ang pagpapa-uli sa mga na-stranded nga residente ug mga overseas Filipinos didto sa kauluhan human sila maabtan og lockdown tungod sa coronavirus pandemic.
Mihangyo si Adiong nga kung mahimo, hinay-hinayan lang ang pagpapa-uli kanila tungod sa kalit nga pagdaghan sa mga positibong kaso sa COVID-19 sa lalawigan sulod lamang sa usa ka semana.
Sa meeting kagahapon sa Inter-Agency Task Force on COVID-19 sa Lanao del Sur, gi-report ni Dr. Alinader Minalang nga aduna nay 18 ka positibong kaso sa lalawigan ug sa Marawi City hangtud kagahapong adlawa tungod sa pagpamauli sa mga locally-stranded individuals ug mga repatriated overseas Filipinos nga natanggong didto sa kauluhan.
Siyam niini mga bag-ong kaso nga nasuta niini lamang semanaha: walo ang taga Marawi, isa ang taga lungsod sa Marantao.
Nasuta sila human mag-reactive sa rapid diagnostic testing ug nakumpirma pinaagi sa reverse transcript-polymerase chain reaction o RT-PCR swab testing.
Sulod sa 45 ka adlaw, nagpabilin untang adunay siyam ka mga kaso sa Lanao del Sur, unom ang naka-recover ug tulo ang namatay. (Divina M. Suson, Marawi City, June 11)
