General Santos City–Land conflict usa sa mga anggulong gitan-aw karon sa Police Station 2 sa nahitabong pagpamusil sa biktimang si Catalino Zonio, hingkod ang pang-edaron ug lumulupyo sa Purok Sugod, Barangay Apopong Gensan.
Sumala ni Police Sr. Inspector Robert Fores, Deputy Chief Of Police sa Police Station 2, base sa ilang inisyal nga imbistigasyon sa pamilya sa biktima, dunay problema ang luna nga gibantayan sa nahisgutan kansa maoy ilang gidudahang hinungdan sa pagpamusil.
Kahinumduman nga una nang gipusil ang biktima alas 9:15 ang takna sa buntag kagahapong adlawa atubangan sa Foton Car Company nga nahimutang sa National Highway, Barangay Apopong ning syudad sa wala pa mailhing suspek nga nakamotorsiklo.
Dugang pagbutyag ni fores nga padayon ang ilang pakig-alayon ngadto sa pamilya sa biktima sa pamasin nga makakuha sila ug lead aron nga matumbok ang suspek sa pagpamusil.
Ila pa usab nga ginahulat nga makarekober ang biktima aron nga maimbistigahan kung unsa gyud ang nahitabo atol sa pagpamusil kanila.
Labaw sa tanan posibli matud pa nga makakuha pa sila ug dugang ipormasyon bahin sa motibo sa pagpamusil ngadto kaniya ug kung nakadawat ba kini ug bahad sa iyang kinabuhi ayha pa nahitabo ang pagpamusil.
