Davao City – Hingpit na nga gipatuman karong adlawa, March 19,2020 ang Region XI land lockdown subay sa hugot nga pagpatuman sa precautionary measures sa paglikay sa Coronavirus disease kun COVID-19.
Sa gipagulang Order No. 2020-001 sa Davao Region Covid-19 Task-Force (COVID-19 RTF) nga gilagdaan ni COVID-19 RTF chair Davao City Mayor Sara Duterte, walay matugtang makasulod og Davao Region gawas sa mga sakyanang adunay kargo ug usa ka driver ug wala nay pahenante.
Matugtan usab ang mga kargo nga adunay sakay nga mga hayup.
Ang mga pahenante kutob ra sa mga checkpoints ug magpaabot ra nga mubalik ang ilahang mga sakyanan hangtod sa muhawa kini sa Davao Region.
Gitahasan ang militar ug kapulisan sa Rehiyon Onse nga hugot nga bantayan ang mga highways aron maproteksyunan ang tanang mga tao ug cargo nga gabyahe.
Bisan kinsa mamahimong makagawas sa rehiyon bisan unsang orasa apan dili na ka makasulod pa atol sa lockdown period sulod sa Marso 19, 2020 hangtod Abril 1, 2020.
Subling gipahimangno ni Mayor Inday Sara sa tanang taga-Davao Region ang pagpundo sa mga panimalay aron mapugngan ang pagkaylap sa COVID-19 ug ang matugtan lamang nga makabahis-bahis sulod sa Davao Region kadtong mga manarbaho.
Niini magpadayon ang stringent screening measures sa tanang musulod og Davao sumala sa alkalde.
Samtang, hingpit nga ipatuman dinhi sa dakbayan ang liquor ban sugod alas 5 sa hapon hangtod alas 8 sa buntag.
Magpadayon ang maong kamanduan kutob sa ma-lift ang public health emergency.
Sugang pa nga suspendido na ang tanang domestic ug international flights pagawas ug pasulod sa Davao City.
Subay kini sa gipagula nga Executive Order No. 12 ug No. 13 sa lokal nga panggamhanan sa Davao.
Niini walay flights hangtod sa sunod nga katorse ka diyas o hangtod sa nga dili pa maayo ang sitwasyon nunot sa COVID-19.
RadyoMaN Aimee Guinita
