Dipolog City – Ugdaw sa sunog ang usa ka landahan nga gama sa light materials human niulbo ang kalayo kagahapon sa hapon didtong dapita sa sitio Balabag Barangay Gulayon, dakbayan sa Dipolog.
Na-abtan pa sa rmn news team ang naglanda nga si Enecrito Alad-ad, 33 anyos, mulupyo sa dapit, nga naghagdaw sa nasunog nga lubi diin sumala pa gipanag-iya kini ni Isa Uy.
Sa interview sa rmn dxdr sa naglanda nga si Alad-ad, bandang alas 11:00 ang takna sa buntag kagahapon dihang iyang gisugdan og haling ang ilawom sa landahan nga dunay mokabat 450 ka buok binuak na lubi.
Atol matud pa sa paghaguros sa kusog nga hangin bandang alas 2:45 sa hapon, gituhoan ang nagdila-ab nga bunot maoy nidip-ig sa bongbong nga tabla nga wa tagad nabantaye niini hinungdan sa pagsilaob.
Gisulayan pa unta nila sabyag sa tubig apan wa na madala ang kakusog sa kalayo, hinungdan nagpatabang na sa kabomberohan.
Ang taga BFP Dipolog igo nalang pag-ispi og tubig sa kalayo ni-ugdaw sa maong landahan.
Padayon karon ang gihimong assessment sa BFP Dipolog kon pilay danyos sa maong sunog.
