Miabot na sa 41 ka mga ATM holders sa Landbank of the Philippine ang giulian sa bangko sa ilang nahanaw nga cash deposits, human mabiktima sa ATM Skimming scam.
Kini maoy gipahibawo ni Manuel Jose Mari Infante, pangu sa East Visayas Branches Group sa Landbank of the Philippines.
Suma ni Infante, nga ang mga biktima sa ATM skimming ang ilang gipangayoan og statement labot sa pagkahanaw sa ilang deposits sa ATM diin sa higayon nga maaprubahan ang re-institution sa ilang account, ang mga biktima ulian og 100% sa ilang total deposits nga nahanaw.
Hinoon, nagkanayon ang opisyal nga direkta kini nilang i-deposit sa ATM account sa ilang mga kliyente, human usab nga gibag-o ang personal identification number (PIN) sa ilang ATM card.
Kahinumduman nga nasikop na sa mga sakop sa National Bureau of Investigation (NBI)-7, ang tulo ka Romanian national nga gitumbok nga suspek sa pag-hack sa mga ATM machines sa Landbank ug napasakahan na sab sila og sumbong ngadto sa piskaliya.
Gitug-an usab ni Infante nga duna pa’y ubang ATM holders nga padayon pang ni-proseso sa pag-re-institute sa ilang account, diin giawhag sa opisyal ang uban pang biktima niini nga modangop sa ilang buhatan.
Nasayran nga moabot sa 2,000 ka mga ATM accounts ang gi-block sa Landbank, isip precautionary measures human misiaw ang mga tawo nga nabiktima sa ATM skimming scam.
Facebook Comments
