Landbank of the Philippines, nakig-alayon na sa NBI-7 sa pag-imbestigar sa insidente sa ATM Skimming scam.

66
Nagpatabang na ngadto sa National Bureau of Investigation (NBI)-7 ang management Landbank of the Philippines, labot sa insidente sa ATM skimming scheme scam nga mibiktima sa ilang mga depositors.
 
Matod ni Manuel Jose Mari Infante, 1st vice-president ug Group head sa East Visayas branches sa Landbank, nga narekober na usab nila ang skimming device nga gigamit sa hacker sa mao nga modus didto sa ilang branch sa dakbayan sa Mandaue nga gi-insert sa ATM machine niadtong Pebrero 27.
 
Nagtuo si Infante nga ang maong device, mao usa’y gigamit sa hacker ngadto sa ilang Banilad Extension Office, diin miabot sa 50 ka mga ATM card holders ang nabiktima sa ATM Skimming scam.
 
Gawas niini, moabot usab sa 2,000 ka mga depositors nga nihimo og transaksyon sa Banilad extension office ang ilang gi-block ang ATM aron sa pagseguro nga dili na makahimo pa sa pag-withdraw ang hacker sa ilang account nga gihulagway ni Infante nga usa ka Romanian national.
 
Sa kasamtangan, dili pa mabutyag sa opisyal kun pila gyud ang kantidad nga na-withdraw sa hacker gikan sa iyang mga biktima nga depositor sa mao nga bangko ug padayon pa ang gihimong pag-kolekta sa management sa bangko og mga datus.
 
Awhag hinoon ni Infante ngadto sa mga depositors kansang ATM card na-block ug na-capture nga daling moduol sa ilang buhatan aron ilang makuha pagbalik ang ilang ATM card ug mailisan ang personal identity number (PIN), hilabi na kadtong mga nakadawat og mensahe pinaagi sa text.

Facebook Comments