Davao City – Patay na nga nakaplagan ang usa ka landlady human kini gidunggab ug gikawatan pa sa iyang kaugalingong house helper sa Digos City.
Naila ang biktima nga usa ka Martina Gamus Tancontian, 68-anyos, byuda, negosyante ug residente sa Brgy. Coronon, Sta. Cruz, Davao Del Sur.
Sa report, alas-7:30 kagahapon sa buntag, sa dihang nakaplagan sa usa ka Valencio Apag Malnegro, 35-anyos, ulitawo ug residente sa Toril, Davao City nga nagbuy-od ug wala nay kinabuhi sulod sa panimalay ang biktima, asa usab siya nag renta.
Segun ni Valencio, alas-7:00 sa gabii niadtong Domiggo, Nobyembre 11, 2018 sa dihang nahitabo ang usa ka komosyon sulod sa pinuy-anan sa biktima rason nga iya gilayon kining gisusi ug iyang nakit-an nga migawas gikan sa kusina si Edelmiro PudPud Agua, ‘alyas Taroroy’ house helper sa biktima, 21 years old ug residente sa Barangay Tuban, Sta. Cruz, Davao del Sur.
Sa dihang adtuon na unta ni Valencio ang biktima sa ikaduhang higayon gipugngan kini sa suspek ug ginapasulod sa iyang lawak gumikan matod pa niini isog na kaayo ang iyang landlady gani nadunggan pa usab ni Valencio nang rebuke ug nanampit sa Ginoo ang biktima.
Apan, kagahapon sa buntag sa dihang gisusi pagbalik ni Valencio ang balay sa biktima nakaplagan na lamang niining abri na ang purtahan sa kusina niini ug naligo na ang biktima sa iyang kaugalingong dugo ug wala nay kinabuhi.
Narekober sa SOCO sa crime scene ang usa ka kitchen knife ug usa ka chopping knife nga gituohang gigamit sa krimen ug matud pa sa kabanay sa biktima nga nahanaw na usab ang cellphone ug pitaka niini ingon man ang CPU sa CCTV nga gituohang gisibat usab sa suspek.
Gilayon nga gisubay sa kapulisan ang gipuy-an sa suspek apan miikyas na kini dala ang iyang mga gamit.
Padayon karon nga gipangita sa kapulisan aron masikop ang responsable.
RadyoMaN Kirbz Manzon
