LANDMARKS

9

Ms. Universe 2018

Gitutukan sa tibuok universe niadtong milabay’ng bulan sa Disyembre ang popular kaayong Ms. Universe 2018 coronation sa Bangkok, Thailand diin malampusong nasakmit sa pambato sa Pilipinas nga si Ms. Catriona Gray ang gikahinam-hinamang korona.

Gipildi sa 24-year-old Fil-Australian beauty ang 93 ka mga kandidata diin nahimong ‘talk of the universe’ and iyang ‘lava walk,’ ‘slow-mo twirl,’ ‘raise the flag’ ug ‘silver linings’ speech.

Pagsugod pa lamang sa competition, nahimo nang bet si Gray ug mibilib ang tanan labi na ang mga hurado sa iyang mga confident answers sa mga pangutana diin gihatagan niini’g emphasis ang paghatag og importansya sa mga kabataan.

Unang nakuha sa Pilipinas ang Miss Universe crown niadtong 1969 pinaagi ni Ms. Gloria Diaz nga gikoronahan sa Florida, USA gisundan ni Ms. Margie Moran niadtong 1973 sa Greece diin human ang 42 ka tuig, una pa nasundan pinaagi ni Ms. Pia Wurtzbach niadtong 2015 sa Las Vegas, Nevada.

Ms. Spain Transgender Woman

Samtang gipalakpakan usab ang pagrampa sa Miss Universe 2018 Beauty Pageant ang pinakaunang transgender woman kun trans woman candidate sa kasaysayan sa Miss Universe: Ang 27-year old candidate nga si Angela Ponce. Mihatag og tribute ang Miss Universe Organization kang Angela diin mirampa kini suot ang iyang sash isip representante sa nasud-Spain. Sa mensahe niini, gisaysay sa kandidata nga dili na importante nga mudaog, igo na sumala pa ang iyang pagrepresenta sa Spain isip usa ka transwoman.

MegaLotto Winners

Gikonsidera usab nga pinaka dakong jackpot prize sa kasaysayan sa lotto sa Pilipinas nga mi-abot sa total nga P1,180,622,508 ang nakuha sa mga instant millionaires nga swerteng mananaog o mga mega lotto winners sa Philippine Charity Sweepstakes Office (PCSO) niadtong October 2018.
Nasayran nga duha ka tao ang nagtunga sa maong kantidad nga taga Legazpi City ug taga Eastern Samar.

Nasayran nga gikan pa niadtong Pebrero 2018, wala nadag-an ang nahisgutang jackpot prize ug sa dihang miabot na kini og P800 milyon niadtong Setyembre daghan na ang naagni nga mupatad diin wala usab nagpaulahi si Pangulong Rodrigo Duterte.

Hidilyn Diaz

Samtang, garbo usab sa Pilipinas ang pagkasakmit ni Olympic silver medalist Hidilyn Diaz ang pinaka-una nga gold medal sa Pilipinas sa women’s 53-kilograms event sa 2018 Asian Games sa Indonesia niadtong August 2018. Gi-alsa ni Diaz ang 207-kgs. aron pildihon si Shermetova sa Turkmenistan. Nasayran nga si Diaz ang unang Pinoy weightlifter nga naka-uli og bulawang medalya sa Asian Games.

Budots / Momoland

Samtang, kinsa usab ang wala nasakasayaw sa mga nag trending nga mga dance craze sa 2018. Ang walay paglubad nga Budots dance nga gipasikat sa mga bisaya. Ug bisan ang mga tugtog sa mga Koreans nga mitatak sa imong dunggan, ang Boom Boom Dance ug ang Baam Dance sa Momoland. Unsa na usab kaha ang mupatok nga mga kanta karong 2019…

Filipino Identification System

Sa laing bahin, nahimo usab nga balaud sa 2018 ang Philippine Identification System Act o ang mas nailhan nga National ID System. Gipirmahan ni Pres. Rodrigo Duterte ang maong balaud nga magpadali sa transaksyon sa matag Pilipino gamit ang usa lamang ka ID. Diha sa maong ID, mahatagan og higayon ang mga awtoridad nga masilip ang impormasyon sa usa ka tawo nga dili usab malapas ang iyang privacy rights ingon man tawhanong katungod. Pinaagi sa maong sistema, mamahimong paspas na unya ang pag proseso gamit ang mga bag-ong teknolohiya labi na pag-abot sa census, taxation, election registration, banking, travel documentation, social security, social welfare ug uban pang transaksyon sa gobyerno.

Expanded Maternity Leave

Samtang sa milabay nga tuig usab na-ritipikahan sa House of Representatives ang 105-day paid maternity leave alang sa mga babaeng trabahante sa government ug private sector. Nakalatid sa ‘harmonized version’ sa House Bill 4113 ug Senate Bill 1305 nga magbaton usab og dugang ‘30 days without pay option’ ang mga bag-ong nanganak nga inahan ug dugang 15 days usab sa mga solo mothers. Mamahimong credited ang maong leave benefits isip kombinasyon og prenatal ug postnatal leaves. Kinahanglan lamang nga dili kini mulapas og 105 days mientras ang postnatal leave dili usab angay mo-ubos sa 60 ka adlaw.

Ateneo ‘Bully Boy’

Ni-ani usab og nagkalain-laing mga reaksyon sa social media ang nahitabong insidente sa bullying sa Ateneo De Manila Junior High diin makita sa video ang pagpanghagit sa estudyante giilang si Joaquin Montes sa kauban niining estudyante samtang anaa sulod sa CR sa ilang tulunghaan. Gisipa ug gisumbag usab niini ang wala nisukol nga estudyante. Gani nagdesisyon na usab ang kadumalahan sa maong unibersidad nga i-dismiss ang estudyante nga nahilambigit sa pagpang-bully. Sa official statement sa unibersidad, gisaysay ni Ateneo President Jose Ramon Villarin nga ang ilang desisyon resulta lamang sa imbestigasyon apil na ang panag-istorya sa mga ginikanan sa mga estudyanteng nalambigit sa bullying incident.

Thai Soccer Players

Samtang sa international scene, gitutukan sa international media ang panghitabo niadtong Hunyo 23, 2018 sa dihang na-trap sa usaka langub sa Thailand sulod sa kapin duha ka semana ang 12 ka tawo o usa ka grupo nga miyembro sa “Wild Boar” football team ug ang ilang coach.

Ang Thai team na-trap sa Tham Luang cave human sila nisulod sa kweba bisan sa kakusog sa pag-ulan niadtong tungora. Gi-angkon sa mga divers nga nalisdan sila sa pag-rescue sa nahisgutang team members tungod sa kalisud sa agi-anan. Anaa sa 19 ka mga divers ang mitabang sa operasyon diin duha ka divers ang nag-assist sa usa ka bata. Hinay-hinay nga gi-agi ang mga bata ilawom sa tubig ug ngi-ob nga langub aron kini makalahos ngadto sa mas luwas nga lugar hangtud nga hingpit kining naluwas. Nasayran nga usa usab ka Dabawenyo giilang si Christoffer John Aquino kinsa pila na ka tuig nga nagatudlo sa Bangkok, Thailand ang mitabang sa pag-rescue sa maong na-trap nga grupo sa mga batan-ong atleta.

RadyoMaN Kirby Manzon

Facebook Comments