Davao City – Gidakop ang usa ka American national atol sa joint-operation sa Bureau of Immigration, Anti-Scam Unit ug National Bureau of Investigation 11 nahitabo Enero 24 sa kahaponon.
Sumala sa Bureau of Immigration XI overstaying na sa iyang tourist visa sulod sa kapin duha ka tuig ug walay working visa ang langyaw nga si James Edward Booyer III, 37 anyos, taga-Indiana, USA kinsa naabtan pa nga nagtudlo’g basketball sa iyang gipuy-ang subdivision sa may Damosa.
Sumala sa Immigration nga si Booyer maoy Project Development Manager sa Ceasar City Corporation ug ka-joint venture sa Mindanao Grassroots Peoples Coalition (MGPC) nga gipamunuan ni Robert Manaois kinsa gireklamo tungod sa alegasyong pagpangilad.
“Based sa findings namo man gud is overstaying alien na siya nag-expire po ang kanyang visa last August 2016 unya nagtrabaho siya diri base sa gipadala nga mga pictures sa Anti-Scam nga naga-attend siya’g seminar, naay mga karatula nga engineer siya, na manager siya which is not allowed sa atoang Philippine Immigration Act kasi all aliens who engaged in their profession or their business must register and apply for a work visa here in the Philippine Immigration,”
Gisulayan sa DXDC RMN Davao nga makuha ang side ni Booyer apan nidumili na kini mga magpainterbyu.
Samtang gibutyag ni Davao City Anti-Scam Unit head Simplicio Sagarino nga apil si Booyer sa 22 ka mga indibidwal nga gipasakaan nila’g kasong may paglapas sa Art. 315 Syndicated Estafa in relation to Sec. 1 sa PD 1689 niadtong Agosto 28, 2018.
Sumala sa usa mga complainants nga si Dolly Tan sa Kalinga sa Kapwa Mindanaoan
nga mokabat sa P1.6M ang nabayad nila sa ilahang grupo nga membership fee ngadto kang Manaois apan wala pa gayod nila madawat ang saad nga livelihood benefits sama sa cattle fattening, goat raising ug chicken production.
Kahinumduman nga gibutyag ni Davao City Mayor Inday Sara Duterte-Carpio nga wala siyay koneksyon kang Robert Manaois o Julius See kinsa mga representante sa MGCP ug nagpahimangno sa publiko batok sa membership recruitment sa pito ka grupo nga alegasyong nalambigit sa pyramiding scam.
Giila kini nga Mindanao Grassroots People’s Coalition, Caesar City Corporation, Mindanao Bunkers Monetary Council, Mindanao Indigenous Sovereign People for CCC, Mindanao Golden Mind Filipino, Mindanao Filipino Religious Sectors, and the Mindanao Filipino Youth Leaders for CCC.
RadyoMaN Aimee Guinita
