Midagsang kagahapon ang kapin 300 ka mga triathletes aron mosalmot sa Leg 2 Triathlon nga ginganla’g Lanorteman, nga gipahigayon sa labing unang higayon sa lungsod sa Kauswagan, Lanao del Norte.
Mao kini ang ikalima ka tuig nga nagpahigayon og national triathlon sa Lanao del Norte, diin tumong sa probinsiyal nga kagamhanan mao ang pagdala sa sports tourism sa lalawigan.
Milangoy sa duha ka kilometrong gilay-on sa may pantalan sa Kauswagan, misikad sa ilang biseklita gikan sa pantalan paingon ngadto sa Munai ug pabalik sa pantalan nga adunay unom ka kilometro ang gilay-on ug midagan og laing duha ka kilometro gikan sa pantalan palibot sa sentro sa Kauswagan ang mga partisipante.
Gikan sa nagkalain-laing dapit sa nasud ang mga atleta nga daghan kanila ang nakasalmot na sa nagkalain-laing international competitions.
Duha ka mga langyaw ang misalmot, diin ang usa niining si Fernando Jose Casares nga gikan sa Spain, unang higayon nga makatamak sa Mindanao.
Matud pa ni Annie Brown, national coach sa triathlon sa Philippine Team, naandan sa organizer nga mopahigayon og triathlon sa Lanao del Norte tungod kay ilang nakit-an ang hugot nga suporta sa local government nga maoy mamahimong hinungdan sa malampusong pagpahigayon sa maong paugnat sa kusog matag tuig.
Matud pa ni Brown nga daghang potensiyal nga triathletes sa Mindanao ug kamatuoran niini, duha ang ilang gi-atiman og gibansay karon nga taga-Iligan City.
