TACLOBAN CITY – Arestado na han mga kasundaluhan an usa ha pinakahataas nga lider han New People’s Army (NPA) ngan upat nga myembro hini ha Northern Samar.
Sumala kan Captain Rayann Velez, tagapagyakan han 8th Infantry Division han Philippine Army, alas 4:3- han kulop dida han byernes han madakop an mga terorista nga NPA.
Ginkilala an naaresto nga lider han npa nga hi Marieta Bartolo, usa nga Front Secretary han Metro 1, Sub-Regional Committee Emporium.
An Metro 1, Sub-Regional Committee Emporium in nag-ooperate ha bungto han Pambujan, San Roque, Silvino Lobos, Las Navas, Mondragon ngan ha Catarman ha Northern Samar.
Ginkilala naman an naaresto nga mga myembro nga hira Ruth Martirez Figueroa, Bayan Muna President-Northern Samar ngan hiya gihapon yana iton Barangay Chairwoman han University Of Eastern Philippines Zone 3 ha Catarman; Eboy Loberiano alyas bagyo ngan Gil Martirez.
An lider nga hi Bartolo in may ginkaka-atubang nga Warrant Of Arrest ha kaso nga murder ngan frustrated murder.
Nakuha tikang ha mga terorista han tulo nga caliber .45 nga pistol, usa nga caliber .38 nga pistol, usa nga caliber 40 glock pistol, ngan usa nga kg 9MM nga pistol.
Narekober gihapon han mga otoridad an envelope nga mayada sulod nga kwarta nga nagkakantidad hin 30,000 pesos ngan mga dokumento.
Sumala kan Col. Ramil Bitong, Commander han 803rd Brigade han Philippine Army, nagtutuo hira nga panuyuan han kwarta in suportahan an kandidatura ni Ruth Martirez Figueroa pagka-ABC President han Catarman, Northern Samar ngan ini in nakaka-alarma daw nga collaboration ni Bartolo ngan Figueroa nga ginkilala nga leader han NPA ngan Bayan Muna.
An mga nasabi nga terorista in kapot na han Northern Samar Provincial Police Office ngan papasakan hin kaso nga kriminal.
