Malaybalay City, Bukidnon – Nakatakdang ipatawag sa Sangguniang Panlungsod sa dakbayan sa Malaybalay si Philippine Charity Sweepstakes Office kon PCSO Branch Manager Mario Pelisco ug ang Trento Gaming Corporation sa sunod nga semana.
Kini human nga gisang-at ni Malaybalay City Vice Mayor Roland Deticio ang iyang concern atol sa privilege hour sa gihimong session regular sa SP kagahapon ilabina ang pagdaghan sa Small Town Lottery (STL) nga walay permit gikan sa City Licensing Office ug SP Malaybalay.
Sa interview sa RMN Malaybalay ngadto kang City Councilor Atty. Jay Warren Pabillaran, gibutyag niini nga na-uyunan nila nga ipatawag kini sa tumong nga maklaruhan ang SP sa kung gi-unsa pag-operate niini sa siyudad nga walay permit.
Matud ni Atty. Pabillaran nga bisan tood ug adunay PCSO Charter ug ilawom kini sa national government apan kinahanglan usab nga masayran nila ang guidelines ug sundon ang unsa may nakalatid sa balaod.
Samtang sa managbulag nga interview sa RMN ngadto kang Board Member Melchor Maramara, gibutyag niini nga dili na kinahanglan nga mag-agi pa kini sa local government unit kon LGU’s kay aprubado na kini sa Sanguniang Panlalawigan.
Apan gibutyag ni Maramara nga ila pang sutaon usab kung kinahanglan ba gayod maglukat ug permit ang nagpadagan sa STL sa mga LGU’s.
Una nang nagpagawas ug resolution ang Sangguniang Panlalawigan ug nagpahimangno sa PCSO Bukidnon nga manguna sa himoon nga consultation.
Kinahanglan matud pa nga tahuron ug i-obserbar ang proseso sa consultation sa tanang magpapatigayon nga musulod sa probinsya nga ipa-ila-ila ang ilang mga produkto ilabina kadtong maka-apekto sa kinabuhi sa mga tawo sama sa sugal kung asa mas daghan ang pilde kaysa daugan.
