Roxas City, Capiz- May yara na sang pito ka napatay bangud sa leptospirosis sa probinsya sang Capiz.
Base sa datos sang Capiz Epidemiological Surveillance and Response Unit(CESRU), gulpi nga nagsaka ang kaso sang leptospirosis nga nalista sa kabilugan nga probinsya sang Capiz subong nga 2018 kun ikumparar sang nakaligad nga tuig 2017.
Halin sa tatlo ka kaso sang 2017, gulpi nga naghampak sa 34 ang kaso sang leptospirosis subong nga 2018 ukon halin sang Enero 1 tubtob Hulyo 14 lamang nga period.
Ini ang kapin sa 1033-percent nga increased rate.
Pinakadamo naman nga kaso ang sa bulan sang Enero kag Pebrero nga may yara sang 15 kag 12 ka bilog, duha sang Marso, tatlo sang Abril kag tig-isa ka kaso sa Hunyo kag Hulyo.
May kaangut sini, ginpahanumdom sa publiko ni Provincial Health Office Information Officer Mr. Ayr Altavas nga likawan gid ang paglusong sa baha ilabe na subong nga tig-ulolan. Nahibaluan nga sarang makuha ang leptospirosis halin sa virus nga halin sa higku sang mga ilaga nga yara sa kontaminado nga tubig.
Mas madali nga makalaton ang virus pinaage sa pagsulod sang mikrobyo nga “leptospira” sa panit nga may yara sang pilas.
Pila lamang sa mga simtomas amu ang lagnat, pagpalanuka, pagpula sang mata sang pasyente, pagpalanakit sang mga kasu-kasuan,palanakit sang ulo kag iban pa.
