Davao City – Subli na usab nga giputos sa tumang kalisang ang katawhan hatud sa Magnitude 6.6 nga linog nga miigo sa pipila ka lugar sa Mindanao pasado 9:00 sa buntag gahapong adlawa.
Nabulit sa dili ti-aw’ng kahadlok ang mga taga Davao samtang migawas sa ilang gitrabahoan ug duna usa’y nakuyapan nga empleyado sa usa ka mall gumikan sa kakusog sa pagtay-og sa kayutaan kun linog.
Sa assessment sa Office of Civil Defense (OCD-XI), nagbilin og dakong damyos sa pipila ka lugar sa Rehiyon Onse ang linog diin ang nagrabehan og mao ang lungsod sa Magsaysay ug Digos City, Davao Del Sur.
Sumala ni Magsaysay Municipal Information Officer Anthony Allada, usa ka estudyante sa Kasuga National High School ang nahulogan sa hollow block ug nakabsan gayud sa kinabuhi.
Dugang ni Allada, nasamutan og kaguba ang ilang Municipal Hall ug samtang dili maagian ang dalan sa usa ka sitio sa barangay Malawanit tungod sa pag landslide sa kilid sa bukid mugna sa makusog nga linog.
Nahugno ang ika-upat nga andana sa usa ka hotel ug naliki ang semento ug nabuak ang mga salamin sa Gaisano Digos mao nga sayo nanirado ang mga establisimyento kagahapong adlawa.
Wala naka-ikyas ang mga buhatan sa DPWH-XI sa Malita, Davao Occidental ug ang Headquarters sa Hagonoy Municipal Police Station, hinoon walay gikataho nga naangol sa nahitabong linog.
Gipasalig ni Davao City Mayor Inday Sara Duterte-Carpio nga wala makamugna og dakung kadaot sa mga gambalay, mga tulonghaan ug mga istruktura sa dakbayan ang temblor kansang epicenter mao gihapon ang unang gitay-og nga Tulunan, North Cotabato.
Sa inisyal nga assessment ni Duterte, nasinati ang damyos ang Felcris Centrale, Gaisano Mall, Toril Public Market ug pipila ka mga tulunghaan denhe sa syudad.
Gimando gilayon sa mayor ngadto sa City Engineers Office (CEO) ang pag-review sa mga plano sa pagtukod sa mga dagkung gambalay ilabi na kung nasunod ba ang standard sa Building Code o wala.
Pikas bahin, gii-awhag ni Davao City Disaster Risk Reduction Management (DCDRRMC) Officer-In-Charge Lyndon Ancajas ang mga Davaoweños nga mag-‘duck, cover and hold’ aron dili madisgrasya sa mga paglihok sa kayutaan.
Ang leksyon kun pagtulon-an sa mga linog mao nga andamon ang mga gamit nga pang-emerhensiya ug batasanon ang pagbansay kanunay sa pagluwas sa kaugalingon gikan sa peligro mugna sa linog.
RadyoMaN Joel Viray
