TACLOBAN CITY – Nag-alotaga an Provincial Government han Leyte hin pondo ha paghatag hin body cameras ha 41 nga Police Stations ha bug-os nga Probinsya.
Ha ginbuhat nga Provincial Peace and Order Council meeting kakulop ha Leyte Provincial Capitol nga gin-atendiran han tanan nga Chief Of Police han City ngan Municipal Police Stations han Leyte iginhatag an mao nga mga body cameras.
Sumala kan Gov. Mic petilla, panuyuan han paghatag hin body cameras ha mga police stations ha Leyte in agud maipakita an transparency han mga kapulisan ha kada police operation nira nga pag-bubuhaton.
“It importante hini iton transparency ha ira mga operasyon kay danay mayda ngani operation nga gin co-conduct gin ki-criticize hira, kadamo man an aton mga kapulisan nga tuhay an ginbubuhat nga operasyon. Para waray duda mas maupay nga butangan naton hito nga mga body cams”
Nalaom an Gobernador nga pinaagi han mga gindistribwer nga mga body cameras in gagamiton ini han mga tagsa-tagsa nga Police Station ha ira mga operasyon ilabi na an operasyon nga may kalabutan ha illegal nga droga.
Plano naman han Provincial Government nga dugngan an mga body cameras kun makita nga magin epektibo an mga ini.
Sumala naman kan PCInsp. Francisco Tupaz, Chief Of Police han Tanauan PNP nga hira in nalilipay ha ginhatag nga body cameras agud maipakita nga seryoso an trabaho han mga kapulisan.
