Magatipon sa Sunburst Park sa maabot nga Marso 15, alas 4 sa hapon ang mga miyembro sang LGBT Community sa Iloilo.
Ini ang nahisugtan sa ginhiwat nga sinapol sang mga lider sang LGBT kaina sang hapon (Marso 7) angut sa nangin pahayag ni anay Provincial Administrator Manuel Mejorada batuk sa mga “agi” sa interview sa isa ka waragwagan.
Suno kay Engr. Edgardo Lopez Suelo, spokesperson sang LGBT Iloilo nga sa nasambit nga pagtililipon, ila pagakondenaron ang pahayag ni Mejorada nga isa ka sahi sang deskriminasyon sa mga miyembro sang LGBT.
Ginpahayag ni Suelo nga siyam ka mga clans sang LGBT ang gin-imbitahan nila nga magtambung kag ginalauman nga mapuno sang ila mga miyembro sang Sunburst Park.
Gin-athag ni Suelko nga wala nila ginapersonal si Mejorada kundi luyag lamang nila tadlungon ang deskriminasyon nga ginahimo sa ila grupo.
Dugang pa sini nga magaserbe ini nga leksyon sa iban pa nga dapat respetuhon man ang mga LGBT.
