Davao City – Gidawat sa Lesbian, Gay, Bisexual and Transgender (LGBT) Davao Coalition ang pagbasura sa Korte Suprema sa petisyon alang sa same sex marriage ug pag-redefine sa esensiya sa pamilya diha sa Family Code of the Philippines.
Matud ni LGBT advocate ug Presidential Commission for the Urban Poor (PCUP) Commissioner Norman Baloro, iyang gi-respeto ang Korte Suprema sa pagkontra sa petisyon nga magtugot sa pareho og gender nga magminyo ug mag-uban isip lehitimo ug legal nga managti-ayon.
Matud ni Baloro, ang nahimong baruganan sa mga mahistrado tinukmod sa realidad nga kadaghanan sa mga Pilipino nisagop sa tinohoang Kristiyanismo busa gilauman na niini nga dili gayod mo-pabor sa same sex marriage ang Korte Suprema.
Segun ni Baloro, dili ikalimod ang kamatooran nga sa Pilipinas, walay social protection policy nga nagprotekta sa katungod ug interes sa LGBT community nga maghatag kanila og igong kagawasan nga maghimo kanilang hingpit diha sa salag sa kaminyoon.
Ubos sa Article 1 ug 2 sa Family Code of the Philippines, bugtong ang lalake ug babaye lamang ang puwedeng makasal diha sa simbahan o dili ba kaha sa civil nga pamaagi diin gawas niana, wala na’y lain pang gender nga gitugotan.
Aminado si Baloro nga bisan ang LGBT community nabahin ug wala magkahiusa sa ilang baruganan labot sa same sex marriage nga hisgutanan subay sa survey nga gihimo dinhi sa syudad.
RadyoMan Joel Viray
