General Santos City,Gipaklaro ni Gensan City Mayor Ronnel Rivera nga wala pay igong rason aron nga ipatuman ang curfew sa dakbayan. Pamahayag niini nga nagpabilin pang hapsay ug malinawon ang dakbayan sa GenSan luyo pa man sa kagubot nga nagpadayon sa syudad sa Marawi.
Atol sa gipahigayong press conference sa lokal nga panggamhanan ning dakbayan, gipbutyag ni Mayor Rivera nga walay angayang kabalak-an sa siguridad gumikan kampante kini sa ginapatuman sa kapulisan sa pagpanguna ni Police Senior Superintendent Maximo Layugan ug sa Joint Task Force GenSan nga gidumalahan ni Col. Bajao.
Saysay ni Mayor Rivera nga wala pa usab siya’y nadawat nga unsa mang direktiba gikan sa DILG o sa Police Regional Office 12 nga magpatuman ug curfew ang dakbayan.
Dugang pamahayag sa nasangpit nga opisyal nga sa karon, wala pa usab siya’y planong magdeklara ug lock down sama sa gihimo sa syudad sa Davao human ang insidente sa Marawi.
Samtang gibutyag ni Mayor Rivera nga karong umaabot nga Mayo 29, adlaw ng Lunes, adunay pagahimuon nga meeting ang tanang mga opisyal sa Mindanao Cluster uban ang Department of Interiror and Local Government (DILG) sa Sultan Kudarat kabahin na sa deklarasyon ni Presidente Rodrigo Duterte nga Martial Law sa tibuok isla sa Mindanao. (Lore Mae V. Romualdo)
