Ivisan, Capiz- Ginkilala ang banwa sang Ivisan bilang 1st – placer sa ginpatigayon nga Search for Environmental Protection and Management ukon Dungog Lunhaw 2020 sa idalom sang pagpatikasog sang provincial government sa pagpanguna sang Capiz Provincial Environment and Natural Resources ukon CAPENRO.
Nakuha sang Ivisan ang una nga pwesto sa Municipal Category kag 1st – place man sa Barangay Category kun sa diin ang Barangay Agustin Navarra, Ivisan ang nagrepresentar.
Sa ihibalo sang tanan, ang Dungog Lunhaw Awards amo anay ang Search for Clean and Green ukon Gawad Pangulo sa Kapaligiran nga kompetisyon sang DILG.
Suno kay Ivisan MENRO Officer Clyde Villareal, nangin epektibo kag nakabulig sang dako nga makuha sang banwa sang Ivisan ang amo nga kadungganan bangud man sa ginapatigayon nga tuigan nga Search for Best Barangay in Environmental Protection and Management sa ila munisipyo.
Diri, ginpasidunggan sang local government unit ang mga kabarangayan nga may yara sang ginatawag nga ‘Best Practices’ paglab-ot sa pagproteher sa palibot.
