Sa exclusive interview sa DXDC RMN Davao kang Ginalyn Cercado Sialana, tag-iya sa iro nga napusilan, iyahang gipanawagan nga maimbestigahan ang kapitan sa Barangay Belmonte nga si Benelabre Gatual nga maoy ilahang ginatudlong nagahimo niini, diin gikwestyon usab ni Sialana kung lisensyado ang ginagamit niining pusil.
Gipasabot ni Sialana nga buot lamang niya nga ipatuman ang balaod sa paghipos sa mga iro, apan dili angay muabot sa punto nga pamatyon ang mga hayop.
“Sa Police Station sa Laak, mao gyud na akong (panawagan) kung unsa inyong saktong imbestigasyon diha sa among barangay nga unta among gusto kalinaw dili kay gubot. Unta pantay ang atong (imbestigasyon). Dili kay naa tay pinalabi o naa tay gidapigan or kinsay mga leader diha. Basta dili maayo buhat, atong himuon ang tama,” panawagan ni Sialana.
Samtang, nahinabi usab sa DXDC RMN Davao si Laak Vice Mayor Mark Anthony Libuangan, gisulti niya nga gitakda niining istoryahon ang gireklamong kapitan ug maglusad usab sila og imbestigasyon.
Nagpaabot na lang usab ang sibyaanan sa reaksyon sa Department of the Interior and Local Government (DILG) Davao de Oro kalabot gireklamong barangay chairman.
RadyoMaN Kirby Manzon
