Makilala, North Cotabato–Nagpadayon ang paghatod ug tabang sa lokal nga panggamhanan sa Makilala ngadto na sa katawhan nga naapektuhan sa sunod sunod nga linog sa ilang lugar.
Matud ni Makilala Vice Mayor Atty. Marvin Tabanay, kagahapong adlawa daghan nang nangabot nga tabang gikan sa Davao City, ug mga kasigbit nga lungsod sa North Cotabato.
Aduna matud pay gipadalang truck ang Davao City ug Midsayap nga puno ug tubig nga sarang magamit sa mga residenting naapektuhan sa kusog nga linog sa Makilala.
Samtang nagpadayag usab ug pagsubo si Vice Mayor Tabanay sa kamatayon ni Batasan Barangay Chairman Cesar Bangot kansa namatay human nga nadat-ugan dihang nahugno ang ilang Barangay Hall human mitay-og ang makusog nga linog.
Matud niini nga ayha nadat-ugan ang kapitan nagkaestorya pa sila ni kapitan Bangot diin iyang gibutyag nga tabangan gyud niya ang iyang mga konstiruwente nga subling makabangon human silang giigo ug usa ka dakong trahedya.
Wala siya magdahum nga mao na kadto ang ilang uwahing panag-estorya human kining nakabsan ug kinabuhi atol sa pagtay-og.
