Gipamahayag karon ni Police Superintendent Rodolfo Inoy Jr., ang deputy provincial director for operation sa Sarangani Provincial Police Office ubos sa pamunuan ni PNP Provincial Director Police Senior Superintendent Alpha Abul Kyr Macalangcom, nga magbinantayon ang mga katawhang Sarangan alang sa seguridad sa tibuok probinsya sa Sarangani.
Kini human sa nahitabo nga pagboto sa gikatahapan nga IED kon Improvised Explosive Device sa dakbayan sa Heneral Santos kagahapon sa udto, adlaw nga Dominggo, sa Crossing Makar, Barangay Apopong, atbang sa Mindanao Polytechnic College, gikaangol sa walo (8) ka indibidwal nga mga taga-Gensan, Polomolok, Isulan og Marbel.
Gisundan pa kini sa laing pagbusikad alas syete kagabii (7:15pm) sa munisipyo sa Midsayap, North Cotabato, maayo na lang walay naigo.
Giawhag ni Police Superintendent Inoy ang mga lumulupyo nga magmaigmat sa gakahitabo sa palibot, kung adunay gikatahapan nga mga butang og indibidwal sa ilang dapit ang i-report dayon matud pa kini sa ilang barangay hall o dili ba kaha diritso na sa kapulisan sa pito (7) ka municipal police station sa Sarangani.
Kung mahimo matud pa ipahibalo ngadto sa mga opisyales sa barangay ang mga bag-o og kadudahang nawong nga ilang makita sa ilang purok og sityo aron masuta nga walay laing dautang elemento ang makasulod.
Nangayo usab kini sa dakong pagsabot sa mga residente, hilabi na sa mga motorista, sa gipakusgan nga pag-inspection sa mga checkpoint nga anaa nahimutang sa mga strategic location sa entiro Sarangani. Lauman matud pa ang taas nga pila sa mga checkpoint, walay laing katuyuan kundili mapakgang ang unsa mang dautang plano.
Gibutyag sa maong opisyal nga nagpabilin nga anaa sa “full alert” ang Sarangani Province human sa naunang pagpabomba sa Isulan, Sultan Kudarat og sa malampuson nga pagbantay sa bag-uhay lang nahuman nga usa ka semana nga foundation anniversary og Kasadyaan Festival sa lungsod sa Alabel.
Una ng gisugilon ni Col. Macalangcom nga aduna kini gibutang nga Boarder Control Point sa munisipyo sa Glan nagsilbing PNP detachment aron ma-monitor ang mga bangka nga gadunggo gikan sa nasud Indonesia isip kabahin sa pagpahugot sa seguridad sa mga border kon boundary area.
Gidasig ng daan ni Governor Steve Chiongbian Solon nga duyugan og tabangan sa mga katawhan ang mga kapulisan og kasundaluhan tungod kay sila ang mas labing nakasinati sa ilang mga lugar.
Matud pa ni Governor Solon, sukad nagdeklara og Martial Law sa tibuok Mindanao niaging tuig, nagpabilin ng nagbinantayon ang mga law enforcement agencies sa Sarangani kauban ang mga force multiplier og community volunteers, sama sa IBDF kon Integrated Barangay Defense and Development Force.
Anaa matud pa ang ilang makanunayon nga pakig-alayon sa AFP og PNP, kauban sila Senador Manny og Congressman Ruel Pacquiao, Vice Governor, mga board member, mga mayores og mga barangay kapitanes.
