LGU Tampakan may resettlement project para sa mga informal settlers sa banwa.

20

Ginpatigayon sang local government unit sang Tampakan ang groundbreaking sa 2.5 hectares resettlement project nga nahamtang sa Purok Milagrosa, Barangay Poblacion sa nasambit nga banwa.
Ang nasambit nga pabahay program ang upod nga ipatuman sang National Housing Authority kag LGU Tampakan nga gindisenyo para sa mga informal settler families nga nagakinahanglan nga irelocate.
Nagalab-ot naman sa P25 million ang pondo nga i-ayuda sang National Housing Authority paagi sa Resettlement Housing Program-Informal Settler Families nga may katuyuan nga mahatagan sang ilistaran ang yara sa isa ka gatos nga mga kwalipikado nga pamilya sa banwa sang Tampakan.
Samtang ang mga target beneficiaries amo ang mga masunod: pamilya nga nagaistar sa danger kag public places, mga nawad-an sang balay tungod naguba sang kalamidad nga nagakinahanglan nga irelocate sa luwas nga lugar, displaced families tungod sa government infrastructure projects, pamilya nga may court order nga pahalinon ukon i-demolish ang ginaistraran kag kwalipikado sa socialize housing.
Sa nangin mensahe naman ni Mayor Leonardo Escobillo sa ginpatigayon nga groundbreaking sang Tampakan Goldenville Resettlement Project ginpahayag sini nga magapadayon ang LGU sa paghatag sa mga nagapanguna nga kinahanglanon sang mga residente sa banwa.
Masunod suno pa sini nga tutukan ang pagtukod sang lokal nga hospital sa banwa nga posible mapatuman sa second quarter sa masunod nga tuig.

Facebook Comments