iFM Laoag – Agtultuloy iti pannakaipaay ti libre a pagluganan nga isagsagana ti gobierno probinsial kangrunaanna iti Metro Ilocos Norte Council wenno MINC a pagluganan dagiti kailian idiay Metro Manila ken Baguio a kayatnan ti agawid ditoy Ilocos Norte.
Segun iti gobernador, linawas nga agrubwat ti lugan ti probinsia a mapan mangala kadagitoy nga immunan nga inpalista ken kiniddaw dagiti kameg ti pamilia da.
Kunana a maysa ti agturong idiay Baguio ken maysa met ti agturong idiay Metro manila a mapan mangsundo kadagiti kailian a kayatnan ti agsubli ditoy probinsia kalpasan iti lockdown gapu pay laeng iti covid 19.
Inlawlawagna a maaramid nga umuna ti schedule sakbay a mapick up dagitoy kadagiti naituding a lugar tapno al-alisto iti panagbiahe dagitoy.
Kasapulan laeng a makikoordinar dagiti kameng ti pamilia dagiti returning residents kadagiti bukod a barangay chairman ken mayor iti bukod nga ili ken ciudad tapno maiyendorsar da iti kapitolio probinsial.
Naiget met iti ar-aramiden ti probinsia a monitoring kadagiti amin a sumrek iti borders ti probinsia ken agsubli iti Ilocos Norte tapno maipan da iti quarantine facilities. (Press Release, Communications and media office)
– Bernard Ver
