Davao City- Traynta ka mga bus ang giandam sa lokal nga gobyerno ning syudad sa higayong ilusad ang transport strike sa pagpanguna sa Transmission-Piston Southern Mindanao Region karong Lunes ( Oktobre 16).
Sa interbyu sa DXDC Rmn Davao kang City Transport and Traffic Management Office (CTTMO) Dionisio Abude nga kining mga sakyanan maoy muhatod sa mga trabahante ug mga pasahero sa tagsa-tagsa nila ka mga destinasyon.
“Alas 5:30 naa na ang mga bus sa atubangan sa City Hall, libreng sakay ni siya,” matud ni Abude.
Aduna usab kini pahimangno sa mga muduyog sa tigil pasada nga respetuhon ang mga drivers nga mobiyahe atol sa strike.
“Para maklaro kung unsa gayod ang ilang mga mulo dili haluan og mga panghurat sa mga jeep nga mamasada, respetuhon sila ug dili sila hilabtan,” sumala ni Abude.
Sa pikas bahin, sumala ni Transmission-Piston SMR Charito Junares nga buot nilang ipasibaw ang ilang pagsupak sa lakang sa public utility vehicle modernization program sa gobyerno tungod kay dakong maapektuhan niini ang mga gagmay’ng drivers ug operators.
RadyoMan Aimee Guinita
