General Santos City— Pormal ng giturn-over ngadto sa lokal nga panggamhanan ang mukabat sa pito sa mga e-tricycle kung asa duha niini ang anaa sa Brgy. Labangal.
Sumala kang Gensan City Councilor Atty. Dominador Lagare III, nga ang mga e-tricycle ang gipahulam sa kumpanyang BEMAC, usa ka Japanese Company nga adunay buhatan sa kauluhan sulod sa tulo ka bulan.
Pormal man usab nga gidawat ni Indigenous People Mandatory Representative Lucio cawayan ang usa ka unit sa E-Tricycle nga gamiton sa sangguniang Panlungsod gikan Lunes hangtud na sa adlaw’ng Byernes.
Gikan karong bulan sa Enero hangtud na sa bulan sa Marso, libre ang pagsakay sa maong mga e-tricycle apan kini ang ibutang sa lugar nga gitawag ug white cluster nga gilangkuban sa Dadiangas Heights, Brgy. Lagao, Brgy. Conel, Brgy. Olimpog, Brgy. San Isidro ug Brgy. Mabuhay.
Dugang pa ni kagawad Lagare nga nagkantidad ug 495, 000 ka pesos ang matag usa sa maong e-tricycle. Samtang mukabat sa upat ka oras ang pag-charge niini aron ma-full ug kaya niining mubyahe ug 60 kilometros kung full charge.
Samtang gipa-klaro ni Cyril Aguadera, ang sales manager sa Bemac nga mas barato ang gasto sa maong E-tricycle kung itandi sa paggamit ug gasoline kung asa ilaha kining ginakonsidera nga eco-friendly gumikan wala man kini naga-buga ug aso sama sa ordinaryong mga tricycle nga ginagamit sa dakbayan.
