Narekober ang libuan ka mga ihap sa 22mm x 189 grams nga mga dinamita ug usa ka anti-personnel nga minahan sa mga personahe sa 8th Infantry Dependable Battalion sa Philippine Army adtong milabayng Biyernes.
Kini human nga gibutyag ni Ronald Landasan, Alyas Gaspar, ang kanhi miyembro ug squad leader sa Sentro De Gravidad (SDG) Dario sa Guerilla Front 89 Sub-Regional Committee 2 (SRC2) ang lokasyon sa maong mga dinamita atol sa iyang pagtahan uban sa iyang pamilya.
Sumala ni Landasan nga dili niya gusto gamiton ang maong mga dinamita batok sa mga sibilyan ug mga sundalo.
Gisulti usab ni LTC. Edgardo Talaroc Jr., Commander sa 88IB nga nakig-alayon na sila sa pagkakaron sa Philippine National Police (PNP) aron nga mapasaka ang tokmang kaso batok sa mga mitahan nga kanhi miyembro sa NPA.
Madumduman nga adtong milabayng semana lang mitahan ang Pamilya Landasan ang kinsa mga opisyal sa Guerilla Front 89 sa Sub-Regional Committee 2 (SRC2) sa NPA.
