Davao City – Gibana-banaang mukabat sa 59 mil ka mga pamilya ang kinahanglan pa hatagan ug tukuran og mga balay dinhi sa syudad sa Davao.
Kini ang gibutyag ni Davao City 3rd District councilor ug chairman on Housing and Development committee Rene Elias Lopez atol sa gipahigayong Pulong-Pulong ni Pulong kaganina.
Subay kini sa ordinansa sa syudad nga mao ang Shelter Code of Davao City diin tumong niini mao ang pagsulbad sa mga pamilyang walay panimalay nga anaa sa ‘poorest among the poor sector.’
Apan giklaro ni Lopez nga dili tanan anaa sa danger zone ug informal settlers ang mahatagan og desente nga pabalay sa gobyerno.
Dugang niini, 223 pa ka ektarya sa yuta ug gibana-banaang mukabat sa 40 billion pesos ang kinahanglanon aron maaksyonan ang nahisgutang housing backlog.
Gilauman sa maong komitiba nga dili mahisama sa housing project sa National Housing Authority (NHA) nga gikuha sa grupong Kadamay ang ubang mga balay.
Sa umaabot nga tuig 2022, sumala pa nga posibleng muabot ngadto sa 123,000 ang kinahanglan pa hatagan og pagtagad sa gobyerno kalabotan sa pabalay.
Noel Mausisa, JMC Intern
