Davao City – Dungan nga nag-duck, cover and hold ang libuan ka mga partisipante sa 1st National Simultaneous Earthquake Drill sa Barangay Mintal ning syudad ganinang alas dos sa hapon.
Daling ni-evacuate ang mga estudyante ug mga residente sa Mintal Elementary School grounds nga maoy main evacuation area atol sa kunuhay pagtay-og sa Magnitude 7 nga linog.
Sumala sa OCD XI nga napili ang Barangay Mintal nga pilot area sa Davao Region tungod kay dinhi nahimutang ang Dacudao Fault Line.
Gibutyag ni DOST-PHIVOLCS Technical Staff Svetlana Tequin nga gikinahanglang hitsas ang maong lugar kay dakong kadaot ang posibleng masinatian kung ugali mang muhapak ang kusog nga linog ug mulihok ang nasangpit nga fault line.
“We can see great possibility of hazard or disaster because daghan ang nagpuyo dinhi ug daghan pod og eskwelahan tapos another thing is ang Dacudao fault which is one of the faults from Davao to Bukidnon area kay duol sa mga gasoline stations, ga-expect ta nga dako ang damage not just with the earthquake but also with fire and rapture,” matud ni Tequin.
Gradong 7.5 ang gihatag ni Tequin sa taga- Barangay Mintal atol sa maong aktibidad.
Samtang gibutyag ni Barangay Mintal Kapital Rey Amador “Tata” Bargamento nga dako ang ilahang trabahuon isip lokal nga mga opisyales aron masigurado nila nga ang tanang constituents kahibalo kung unsay himuon panahon nga mulihok ang Dacudao fault line.
Kahinumdunan nga niadtong 1907 ulahi kining nilihok atol sa pagtay-og sa Magnitude 6.7 nga linog.
Nagpahigayon usab og mga earthquake drills ang laing 19 ka mga ahensya sama sa DSWD, DILG, LTO XI, BFP, Eastern Mindanao Command ug uban pang mga tulunghaan dinhi sa syudad.
RadyoMaN Aimee Guinita
