Gin-anunsyo ni Department of Information and Communications Technology (DICT) Undersecretary for Operations Senior Undersecretary Eliseo Rio Jr., nga igahatag na sa ikatatlo nga telco player ang lisensya sa pag-operate sa Lunes, Hulyo 8.
Sa ‘Meet the Press’ forum sang National Press Club, ginsiling ni Rio nga natalana nga i-award sa Mislates nga ginapanag-iyahan sang negosyante nga si Dennis Uy ang ginatawag nga Certificate of Public Convenience and Necessity, subong man ang Frequency to Operate nga patigayunon sa Malacañang Palace sa Lunes kasunod man sang pag-approve sang prangkisa sini sang duha ka kapulungan sang Kongreso.
Dugang pa ni Rio nga may five-year commitment ang ikatatlo nga telco nga may kadasigon nga 27 megabytes per second rason nga ginalauman ang mas manami nga kompetisyon sa bahin sang mga telcos sa pungsod.
Ginpahayag man ni Rio nga damlag lang mas nagdasig ang serbisyo sang Globe kag PLDT-Smart matapos mahibalu-an ang pagsulod sang third telco.
Nahibalu-an nga nagapadayon ang pagbutang sang fiber optics sang Mislatel subong man ang cell sites sa nagkalain-lain nga bahin sang pungsod sa Metro Manila, Cebu kag Davao kun sa diin lauman nga una makakuha sang subscribers sa Metro Manila.
Matandaan nga ang third telco player ang nangin promisa sadto ni Pangulong Rodrigo Duterte para mas mapadasig ang wifi kag mapanubo ang presyo sang serbisyo sang telecommunications sa pungsod.
