Giila ni DDSPPO Director Police Col. Giuseppe Geralde ang lider sa mga kriminal ug wanted person nga si Lilong Cansing, nagpuyo sa Barangay Kimlawis, Kiblawan, Davao Del Sur kinsa dunay pending nga mga kaso sa kidnapping ug frustrated murder sa korte.
Sumala ni Geralde, muabot sa pila ka semanang gihap-an sa mga sakop sa DDSPPO ug kapulisan sa Kiblawan ang akusado sa bukiran nga bahin sa Barangay Kimlawis hangtud nga nadakpan kini.
Segun ni Geralde, si Cansing maoy gitudlong nangdagit sa usa ka kagawad sa Kimlawis niadtong tuig 2021 ug pakyas nga pagpatay apan wala dayon madakpi gumikan kay nagtago sa hilit nga Sitio sa nasampit nga barangay.
Si Cansing, maong gitudlong lider sa 25 ka mga notadong kriminal nga naglihok sa Kiblawan ug 22 kanila ang nadakpan ug nisurrender human nakorner sila sa kapulisan diin tulo na lang nga sakop sa Cansing Group ang padayon gipangita sa mga aworidad.
Giingon sa Director, ang grupo ni Cansing ang giingong manghulga ug ga-extort sa mga mag-uuma nga manglugsong sa sentro sa barangay aron maninda sa ilang mga produkto gikan sa ilang mga uma.
Gikonsidarang natuldokan na sa kapulisan ang kabangis sa grupo ni Cansing ug kahadlok sa mga lumulopyo sa Barangay Kimlawis sanglit armado ang naasoy nga organized crime group.
Atol sa operasyon sa miaging adlaw, nakumpiska gikan sa posisyon sa dinakpan ang upat ka homemade shotgun, mga armas, ug mga bala. Tungod niini, madugangan na usab og laing mga kaso ang atubangon sa lider sa mga kriminal sa Davao del Sur.
Sa pagkakaron, usa nalang ka organized crime group nga naglihok gihapon sa Kiblawan ug padayon gipanid-an ug gina-ukoy sa mga tinugyanan sa balaod.
RadyoMaN Joel Viray
