Lider sang drug group sa Kabankalan City, Negros Occidental, arestado

Arestado ang babayi nga ginatudlo lider sang isa ka drug group kag kaupod sini nga beautician sa ginpatigayon nga drug buy-bust operation sa Purok Paraiso, Barangay Hilamonan, Kabankalan City kaina sang aga, August 15, 2022.

Yara na sa kustodiya sang Kabankalan City Police Station si Jonalyn Bugalon alias Mommy Jing, 49-anyos, isa ka high-value individual kag ginatudlo nga lider sang Bugalon Drug Group. Kaupod sini nga naarestar si Juanito Artisano alias Jerome, isa ka beautician nga pumuluyo naman sang Purok Riverside, Barangay Suay, Himamaylan City.

Nakumpiskar sa mga ini ang 13 ka sachets nga nagaunod sang suspected shabu lakip na ang buy-bust item. Nagabug-at sang 130 grams kag nagabalor sang P884,000 ang nakumpiskar nga suspected shabu.

Ginpanginbulahan naman ni Negros Occidental Police Provincial Office Director PCol Leo Pamittan ang Provincial Drug Enforcement Unit kag Kabankalan City Police Station sa ila nangin accomplishment. (Photo by Kabankalan CPS)