Midsalip, Zamboanga del Sur – Patay ang upat ka lalaki nga sakop sa criminal gang sa nahitabong engkwentrohanay tali sa kapulisan didtong dapita sa Purok 4, Barangay Cumarom sakop sa lungsod sa Midsalip ning probinsya sa Zamboanga del Sur.
Sa interview sa RMN Pagadian kang PSI Kenneth Soon, ang hepe sa Midsalip MPS gibutyag niini nga ilang gikasa ang law enforcement operation kagahapon sa kadlawon.
Kauban nila ang tropa sa Regional Intelligence Division 9, Regional Special Operation Group 9-Task Force Tugis, Regional Intelligence Unit 9 ug Regional Mobile Force Battalion 9.
Gipatin-aw sa hepe nga una matud pang nagpabuto sa ilang armas ang grupo sa mga suspek dihang nakamatikod kini sa presensya sa otoridad nga miresulta sa sinukliay og bala.
Nalukong sa kapulisan ang mga target sa operasyon hinungdan sa kamatayon sa lider nga Top 7 Most Wanted Person sa tibook probinsya nga si Ramon Bantayan.
Dead on the spot usab ang mga sakop niini nga sila si Rondi Bantayan, Jomi Bantayan ug Omie Bantayan nga nag-atubang sa daghanang kaso.
Nakuha sa dapit nahitaboan ang daghanang klase sa improvised shotgun, 45 nga pistola, mga bala ug mga hait nga hinagiban.
Gikomperma ni Soon nga labad sa ilang lugar ang grupo Bantayan kay gika-intapan man kini sa mga lumulupyo sa dapit.
Nakahipos usab og impormasyon ang kapulisan nga gumikan sa kamantas sa nahisgutang grupo kan-on na niini ang atay sa ilang mapatay.
