Davao City – Kritikal ang gitawag nga ‘life support system’ ingon man ang rekwisito sa koneksyon kun ‘attachment’ sa komunidad ngadto sa mga tawong nakasinate karon ug dagku nga mga hagit kun suliran sa kinabuhi nga kun dili husto ang pag-handle, posibleng mosangpot sa depression ingon man suicide.
Sa interview sa morning primetime radio social commentary nga ‘Straight to the Point,’ gipaambit ni City Councilor Mary Joselle Villafuerte, chairperson sa SP Committee on Health nga pending na karon sa hawanan sa konseho ang sugyot-balaudnon alang sa pag-establisar sa usaka special hotline alang niadtong buot magpatabang sa ilang gibati nga depression.
Matud ni Villafuerte, tipik ug kabahin sa proposal mao ang pagtukod sa usaka dedicated section diha sa City Health Office (CHO) kansang mandato mao lamang gayud ang paghatag ug intervention sa mga lungsuranong naga-struggle karon sa dili maayong mga panghitabo sa tagsa-tagsa nila ka mga kinabuhi.
Hugot usab giduso sa konsehala sa Tersero Distrito nga importante kaayo ang partisipasyon sa pamilya, eskwelahan ug komunidad silbing ‘life support system’ sa mga tawong nanginahanglan ug hinanaling tabang pinaagi sa guidance counseling ingon man effective parenting.
Anaa na karon on second reading sa Sangguniang Panglungsod sa Davao ang proposed Mental Health Ordinance of Davao City ug gilaumang mapasar na sa dili madugay.
Ning labing ulahi, nakakuha pag-usab sa atensyon ug alarma sa publiko ang sunod-sunod nga mga insidenteng suicide denhe sa dakbayan pananglit niadtong bana nga nagpakamatay human gibulagan sa iyang asawa.
Base sa nakalap nga mga datos, ika-lima ang Davao City sa mga lokalidad nga adunay pinaka-taas nga suicide incidence sa entero nasud-Pilipinas.
RadyoMaN June Duterte
