Davao City – Tabangan sa Liga ng mga Barangay ng Pilipinas ang mga Barangay Captains kinsa nakasuhan tungod sa alegasyong anomaliya kun tinonto diha sa Social Amelioration Program (SAP) distribution ubos sa Department of Social Welfare and Development (DSWD) inabagan sa mga barangay functionaries.
Gibutyag ni LBP Mindanao Area Vice-President Edgar Ibuyan Sr. nga ang ilang Liga chapter mismo ang nagtanyag og tabang-legal ngadto sa mga kapitan kinsa giakusahang nahilambigit sa binuang kun hocus-pocus sa implementasyon sa COVID-19 economic alleviation program.
Segun ni Ibuyan, ang Liga mag-provide og legal assistance ngadto sa mga gikwestion nga barangay officials aron panalipdan ang ilang katungod bisan tuod og adunay gibug-aton ang pasangil batok kanila mahitungod sa alleged anomalies and favoritism.
So far sa tibuok nasud, mukabat na sa 89 ka mga Punong Barangay mientras dinhi sa Region XI, adunay lima nga giakusahang involved sa salimpangkong nga binuhatan.
Ang mga giakusahan mao sila si: Maria Te sa Barangay Manuel Roxas, Governor Generoso, Davao Oriental; Josephina Pardillo sa Barangay Libertad,Bansalan, Davao Del Sur; Aurora Benemerito sa Barangay Bangkal, Matan-ao, Davao Del Sur; Noel Alo sa Barangay Mayo, Mati City, Davao Oriental ug Apolonio Toledo sa Barangay Harada Butal, Padada, Davao Del Sur.
Gitino ni Ibuyan nga bisan tuod kon naghatag sila og legal assistance sa nahisgotang mga personalidad, wala kini nagpasabot nga kumbinsido na ang Liga sa pagka-inosente sa mga hingtugdan sa gilabay ngadto kanila nga seryosong alegasyong pagpangawkaw sa kaban sa estado.
Dugang pagpaklaro ni Ibuyan nga ang Liga dili puwedeng mag-apil-apil or bin ba kaha manghunaw sa ilang responsibilidad sa maong mga kasong gikasang-at na ngadto sa mga hingtungdang ahensiya.
Ang SAP makonsidera nga usaka major centerpiece program sa Duterte administration tubag sa economic dislocation bunga sa pandemic.
“Nag-offer mi (Liga ng mga Barangay sa Pilipinas) og legal assistance sa mga nakasuhan…Ila man ‘to gihimo, so ila ‘tong tubagon…Pero ato silang providan og abogado…Dili man ingon nga mutabang aron ma-dismiss ang ilang kaso, kon dili, ilaban lang gyod kung unsay ilang mga katungod kay dili man ‘ta puwede mag-apil apil pod nga muingon ‘ta nga limpyo sila,” panapos sa maong opisyal.
RadyoMan Joel Viray
